‘Riekdom maekt de soep niet lekkerder’, de ni’je verhaelebundel van Freddie de Vries (1959) uut Hooltpae, wodde zaoterdagaovend 13 april prissenteerd in kefé De Rustende Jaeger in Hooltpae. De aachterzael van et kefé zat mooi vol met dik 60 man dat geneut van de verhaelen van Freddie en de lieties van De Klabienders.

De kefébaozin kreeg et eerste exemplaor uut hanen van Freddie, omdat zi’j een echte Stellingwarver is en omdat Freddie graeg even in de kroeg in Hooltpae zitten mag op zaoterdagaovend. Et boek is uutgeven deur de Stellingwarver Schrieversronte en kost €15,95. Et boek is te koop via ‘boeken’ op disse webstee www.stellingwarfs.nl en in de boekewinkel.

Freddie de Vries is een echte man van de Stellingwarven. Hi’j is een netuurmeenske die him inzet veur behoold van de netuur en de cultuurhistorie van de streek. Dit vien ie riegelmaotig terogge in zien ofwisselende verhaelen. Veerder geft hi’j al jaorenlang exkursies in de Stellingwarfse netuurgebieden. Daornaost zit hi’j bi’j een stokmennig verienings in zien dorp Hooltpae. Veural bi’j de voetbalclub VVO, waor as een hiele flutte ‘De Vriesies’ bi’j betrokken binnen, is hi’j vaeke te vienen. In dit boek mit mar liefst 44 verhaelen gebeuren weer allerhaande vremde dingen en bi’jtieden weej’ niet waor as et op uutdri’jt. Mar dat maekt et lezen d’r van ok wel daj’ ni’jsgierig binnen naor et aende van zoe’n kruderig verhael waor as vaeke ok nog zien ‘dreuge’ humor om de hoeke kieken komt.

Foto: Lenus van der Broek